២- សំណើសុំការអនុម័តលើគម្រោងវិនិយោគសាងសង់រោងចក្រអគ្គិសនីដុតធ្យូងថ្មនាំចូល កម្លាំង ២០០ មេហ្គាវ៉ាត់ នៅក្រុងព្រះសីហនុ

គណៈរដ្ឋមន្ដ្រីបានសម្រេចឯកភាពលើគម្រោងវិនិយោគ សាងសង់រោងចក្រអគ្គិសនីដុតធ្យូងថ្មនាំចូល កម្លាំង ២០០ មេហ្គាវ៉ាត់ នៅក្រុងព្រះសីហនុ តាមសំណើរបស់ក្រសួងឧស្សាហកម្ម រ៉ែ និងថាមពល ដូច ខាងក្រោម ៖

១.១- អនុញ្ញាតឱ្យក្រុមហ៊ុន Power Synergy Corporation Co., Ltd វិនិយោគលើគម្រោងសាងសង់ រោងចក្រអគ្គិសនីដុតធ្យូងថ្មនាំចូល កម្លាំង ២០០ មេហ្គាវ៉ាត់ នៅក្រុងព្រះសីហនុ។

១.២- អនុញ្ញាតឱ្យក្រសួងឧស្សាហកម្ម រ៉ែ និងថាមពល ចុះហត្ថលេខាលើកិច្ចព្រមព្រៀង អនុវត្ដគម្រោង វិនិយោគនេះ ជាមួយក្រុមហ៊ុន។

១.៣- អនុញ្ញាតឱ្យក្រសួងសេដ្ឋកិច្ច និងហិរញ្ញវត្ថុ ចុះហត្ថលេខាលើលិខិតធានារបស់រាជរដ្ឋាភិបាល សម្រាប់គម្រោងវិនិយោគនេះ។

១.៤- អនុញ្ញាតឱ្យអគ្គិសនីកម្ពុជា ចុះហត្ថលេខាលើកិច្ចព្រមព្រៀងទិញ លក់ អគ្គិសនី សម្រាប់គម្រោង វិនិយោគនេះ ជាមួយក្រុមហ៊ុន។

១.៥- ធ្វើសំណើសុំទៅស្ថាប័ននីតិប្បញ្ញត្ដិ ដើម្បីផ្ដល់សច្ចាប័នលើលិខិតធានារបស់រាជរដ្ឋាភិបាល ក្រោយ ពេលក្រសួងសេដ្ឋកិច្ច និងហិរញ្ញវត្ថុ ចុះហត្ថលេខាលើលិខិតធានានេះរួច។

ទន្ទឹមនេះ គណៈរដ្ឋមន្ដ្រីបានសម្រេចប្រគល់ភារកិច្ចជូន

២.១- ក្រសួងឧស្សាហកម្ម រ៉ែ និងថាមពល សហការជាមួយក្រសួងកសិកម្ម រុក្ខា ប្រមាញ់ និងនេសាទ ធ្វើ ការសិក្សារួមគ្នា ក្នុងការកសាងផ្លូវប្រវែងជាង ៤០ គ.ម ពីទីរួមខេត្ដកោះកុង ទៅដល់ទីតាំងគម្រោង ស្ថានីយវារីអគ្គិសនីស្ទឹងឫស្សីជ្រុំក្រោម កម្លាំង ២៣៥ មេហ្គាវ៉ាត់ ដើម្បីបម្រើសេចក្ដីត្រូវការក្នុងការដឹក ជញ្ជូនគ្រឿងចក្រ សម្ភារៈ និងបរិក្ខារ សម្រាប់ការសាងសង់ស្ថានីយវារីអគ្គិសនីនេះ និងសម្រាប់ការតភ្ជាប់ គម្រោងខ្សែបញ្ជូនអគ្គិសនី ពីស្ថានីយវារីអគ្គិសនីស្ទឹងឫស្សីជ្រុំក្រោម ទៅទីរួមខេត្ដកោះកុង។

ការពិភាក្សា និងការសម្រេចលើដំណើរការសាងសង់ផ្លូវខាងលើនេះ គឺពុំចាំបាច់ធ្វើការចរចា ជាមួយ អង្គការ Wild Aid ឬរង់ចាំការធ្វើសិក្ខាសាលារបស់អង្គការ Wild Aid ឡើយ។

២.២- ក្រសួងឧស្សាហកម្ម រ៉ែ និងថាមពល ប្រើប្រាស់ពាក្យ “អត្រាពន្ធសូន្យ” ជំនួសពាក្យ “លើក លែងពន្ធ” ដូចមាននៅទំព័រទី ៣២ ចំណុចទី ៣ និងចំណុចទី ១០ នៃឯកសារគម្រោងអភិវឌ្ឍន៍រោងចក្រ អគ្គិសនី ដុតធ្យូងថ្មនាំចូល កម្លាំង ២០០ មេហ្គាវ៉ាត់ នៅក្រុងព្រះសីហនុ ដោយកែសម្រួលទៅជា ៖

ចំណុចទី ៣ ៖ “អត្រាពន្ធសូន្យ លើការនាំចូលធ្យូងថ្ម សម្រាប់រយៈពេលធ្វើអាជីវកម្ម” និងចំណុចទី ១០ ៖ “អត្រាពន្ធសូន្យ លើការនាំចូលគ្រឿងម៉ាស៊ីន បរិក្ខារ ឧបករណ៍ និងសម្ភារៈនានា សម្រាប់ការសាងសង់ លើកលែងតែប្រេង ឥន្ធនៈដែលប្រើប្រាស់ក្នុងពេលសាងសង់ ក្រុមហ៊ុន ត្រូវបង់ពន្ធ ធម្មតា ស្របតាមច្បាប់ វិនិយោគ និងសេចក្ដីប្រកាសផ្សេងៗដែលពាក់ព័ន្ធ”។

៣- បញ្ហាផ្សេងៗ

ទទួលបានសេចក្ដីជូនដំណឹងនេះ គ្រប់ក្រសួង ស្ថាប័ន និងអាជ្ញាធរដែនដីពាក់ព័ន្ធ ត្រូវយកចិត្ដទុកដាក់ អនុវត្ដឱ្យទទួលបានលទ្ធផលជាវិជ្ជមាន។